ඕස්ට්‍රේලියානු සහ ශ්‍රී ලංකා දේශද්‍රෝහියෝ

"ශ්‍රී ලංකාවේ සිට සංක්‍රමණය වී තම රටේ පුරවැසි භාවය ලබාගෙන ශ්‍රී ලංකාවට ම චියර් කරන මිනිසුන් ගැන ඕස්ට්‍රේලියාවේ දේශප්‍රේමී, දේශමාමක ජනතාවගේ ආකල්පය කෙබඳු වේද?" ෆේස් බුකියේ ලංකික ක්‍රිකට් කමිස ඇඳගත් ඔස්ට්‍රේලියාවට සංක්‍රමණය වූ ශ්‍රීලාංකිකයන් ක්‍රිකට් තරඟ නරඹමින් ලංකාවට චියර් කරන පිංතූර සහිත ලිපියක් දැක්කා. ඇත්තටම කල්පනා කරලා බලනකොට කතාවේ ඇත්තකුත් නැත්තේම නෑ. ඕස්ට්‍රේලියාවේ ජීවත් වෙවී එහෙ පහසුකම් ඔක්කොම භුක්තිවිඳින ගමන් ලංකාවට ආවඩන එවුං ගැන සුද්දන්ට පුදුම "මළක්" ඇත්තේ.

 කැප්ටන් ජේම්ස් කුක් ඔස්ට්‍රේලියාවට ගොඩ බැස්සට පස්සෙ ඔස්ට්‍රේලියාව බ්‍රිතාන්‍ය කොලනියක් බවට පත් උනා. මුල්ම කාලේ බ්‍රිතාන්‍යයෙන් ඔය වගේ යටත් කරගෙන කොලනි පිහිටවන්න තීරණය කරපු රටවල් වලට පදිංචිකාරයෝ විදියට ඒ රටවල් වලට "ඇණයක්" වෙච්ච මිනිස්සු ටික එව්ව කියල තමයි මම නං අහල තියෙන්නෙ. 11 වසරේදී අපේ සමාජ අධ්‍යයන මිස් නං කිව්වෙ ඔස්ට්‍රේලියාවට එව්වේ එංගලන්තේ හිටපු "පිස්සො" ටික කියලයි. සිම්බාබ්වේ වලට ගිහිං දැම්මේ එංගලන්තේ හිටපු "මිනීමරුවෝ, දාමරිකයෝ" ටික කියලයි. කතාවේ ඇත්ත නැත්ත දන්නෙ නැති උනත් ඒ ගැන හිතනකොට එකේ අත්තක් නැත්තේම නෑ කියලත් හිතෙනවා. ඒ වගේ පාළු  නොදන්න රටක මුල් පදිංචිකාරයෝ විදියට  ජීවත් වෙන්න යන්නෙ, ඉන්න තැන් වල යමක් කරගන්න බැරි "ආතක් පාතක්  නැති" එවුං තමයි බොහෝ වෙලාවට. 

 ව්‍යාපාරික අරමුණු , නව ගවේෂණය සහ වාසනාව උරගා බැලීමේ අදහසින් යන උදවියත් ඉන්නවා තමයි. ඒත් ඔය ආක්‍රමණ කාරයෝ ආපුවම උන් ස්වදේශිකයන්ට කෲර විදියට සලකන්නේ බොහෝ වෙලාවට ආක්‍රමණිකයා "අර ජාතියේ" එකෙක් උනාමයි. මොකද සුද්දෝ කියන්නෙ අපි දැන් දන්න විදියට නරක ජාතියක් නෙවෙයි. ඒත් ලංකාවට ආපු සුද්දො ගැන ඒ කාලේ ඉඳන්ම තියෙන්නෙ එච්චර හොඳ ආකල්පයක් නෙවෙයි. තමන් මස් කනකොට ගෙදර බල්ලටත් "කටු කෑල්ල හම්බවෙනවා වගේ" එංගලන්තෙන් එව්ව උන් ඉන්න රටවල් වලට සෑහෙන තරමේ පහසුකම් මව් රටෙන් ලැබුනා. ඒ වගේම ඕස්ට්‍රේලියාව වගේ "අලුත් ලෝක" වල තිබුන ස්වභාවික සම්පත් උන්ට නිධානයක් වගේ උනා. භූමිය, ස්වභාවික සම්පත් ඇතිවෙන්න තියන රටට අවශ්‍ය උනේ මිනිස් සම්පත. එංගලන්තෙන් ඉල්ලගෙන කාපු, සුද්දෝ දම්මල සුද්දකරපු,ඔස්ට්‍රේලියාව ධන උල්පතක් වෙන්න පටන් ගත්ත.

 රටේ ඉඩ ඕනතරම්, මිනිස්සු නෑ(අඩුයි), ජීවත් වෙන්න සුදුසුයි, ස්වභාවික සම්පත් ඕනෑ තරම්. තවත් ඉතිං මොනවද ඕන කරන්නෙ? ඒ ස්වභාවික සම්පත් වලින් වැඩ අරගන්න පුළුවන් ශ්‍රමය සහ මොළ. අන්න ඒක පුරවන්න තමයි අපේ එවුනුත් එහෙ යන්නෙ.

 මෙහෙ ඉගනගෙන යම්කිසි දේක ප්‍රවීනත්වයක් ලබල ඉන්නකොට ඒ රටෙන් ඒ වෙනුවෙන් හොඳ ගෙවීමක් කරන්න ලෑස්ති නම්, යටිතල පහසුකම් උපරිමයෙන් ලබා දෙනවා නං ,එහෙ ගියොත් ගොඩ යන්න පුළුවන් නං තවත් මොනවද බල බලා ඉන්නෙ. ඒ විදියට තමන්ගෙ  හැකියාවට සුදුසු රැකියාවක් ලබාගෙන එහෙ ජීවත් වෙන එක තමයි "ඔසී" ලාංකිකයෝ  කරන්නෙ. අපේ උන්ගේ මොළ සහ ශ්‍රමය සල්ලි වලට අරගෙන උන්ගේ වැඩ කරවගන්න එක එතන සිද්ද වෙන්නෙ. ඒ වෙනුවෙන් අපේ එවුන්ට හොඳට ගෙවනවා. ලස්සනට ජීවත් වෙන්න වටපිටාවක් හදලත් දෙනවා. තවත් ඉතිං මොන කතාද.

 අපේ උනුත් එහෙ ගියාට ගොඩක් වෙලාවට "හදවතින්ම ශ්‍රී ලාංකිකයි" .  එහෙන් සල්ලි හම්බකරලා මෙහෙට එවනවා. මෙහෙ ඉන්න උන් එහෙට ගෙන්නගන්නවා. ඒ වගේම ඒ රටටත් යම්කිසි වැඩ කොටසක් කරන ගමන් මෙහෙටත් කරනවා . බලනකොට ඔය කිසිම දේක වැරද්දකුත් නෑ. තමුන් ඉගනගත්ත හෝ පුරුදුවෙච්ච කිසියම් "ට්‍රේඩ්" එකක් ,"ස්කිල්" එකක් පාවිච්චි කරලා තමාගේ ජීවිතය සරි කරගන්නවා. කොහේ ජීවත් උනත් වෙන්නෙ ඕකනේ.එහෙට ගියාම අපේ උන්ගේ අපේකම කොච්චරද කියනවා නං ඉස්කෝල වල, විශ්වවිද්‍යාල වල, කාර්මික විද්‍යාල වල බැච් පිටින් එක ළඟ එකම වීදි වල ජීවත් වෙන්නෙ කියල මං අහල තියනවා.

 

එතකොට මුස්ලිම් මිනිස්සු ලංකාවට එන්නේ මොකටද? වෙළඳාම් කරන්න. ඒ වෙළෙන්දොත් එක්ක මුස්ලිම් ගෑණු උදවිය ආවද? බොහෝ දුරට නෑ. කාලයක් තිස්සෙ ලංකාවේ ජීවත් වෙච්ච මුස්ලිම් මිනිස්සු මෙහෙ අලුත්ම සංස්කෘතියක් හදාගෙන. හැබැයි ආගම නං පුතෝ ගලවන්න බැරිවෙලා. සිංහල ගෑනුත් එක්ක දීග කාලා හැදුනු කලවම් ජාතිය උනාට ඒ උදවිය තාමත් මුස්ලිම් ආගම අදහන්නේ. ආගමානුකූලව හැම වෙලාවකම ජීවත් වෙන මුස්ලිම් මිනිස්සු වෙළඳාම තමයි තාමත් කරගෙන යන්නෙ ප්‍රධාන වශයෙන්. අම්පාර වගේ පළාත් වල "මට්ටයෝ" විදියට හඳුන්වන කෘෂිකාර්මික මුස්ලිම් කුලීකරුවනුත් නැත්තේම නෑ. ඒත් වැඩි දෙනෙක් කරන්නෙ වෙළඳාම. පාරිභෝගිකයන්ට බොහොම යටහතොඅහත්ව සුහද විදියට සලකලා කොහොමහරි තමුන්ගෙ භාණ්ඩේ විකුණගන්න අදටත් මුස්ලිම් මිනිස්සුන්ට ලැබිල තියන හැකියාව එන්න ඇත්තේ අරාබි වෙළඳ මුතුන්මිත්තන්ගේ ජාන වලින් වෙන්න ඇති. හරක් මැරීම, වෙළඳාම, මුස්ලිම් පල්ලි, මක්කම් යාම, බුර්කා, තොප්පි, වටපල්ලන්, ඝනට වවාගත්ත රැවුල්, රෝල්-ඕන් සෙන්ට්, එළුවෝ, වෙනස් විදිහෙ සරොම්, මේ ඔක්කොම ලංකාවේ මුස්ලිම් සංස්කෘතියෙ ලක්ෂණ.

 "බිස්මිල්ලාහ් -ඉර් රහ්මාන්-ඉර් රහීම්" වලින් පටන්ගන්න ආගමික පාඨ "අල්ලාහු අක්බර්' වලින් පටන් අරන් සරින් සැරේට පල්ලියේ ලවුස් පීකරෙන් කියවෙන ආගමික වදන් අපිටත් අමුතු දේවල් නෙවෙයි. තවත් දෙයක් ආගම මුස්ලිම් උනාට මුතුන්මිත්තෝ අරාබි ජාතිකයන් උනාට මෙහෙ මුස්ලිම් මිනිස්සු කතාකරන්නෙ දෙමළ භාෂාව.එහෙම කරන්නෙ මහ ජාතියට වෙළඳාම් කරද්දී ඒ උදවියට නොතේරෙන්න උනුන් අතර දෙමලෙන් වචන හුවමාරු කරගන්න ඕන කම නිසාද එහෙමත් නැත්තං සිහලයන්ට වඩා සුළු ජාතියක් වෙච්ච දෙමළ උදවියට මේ උදවිය වඩාත්  සමීප වෙච්ච නිසාද කියන්න මමත් හරියටම දන්නෙ නෑ.

  

ඔන්න දැන් එන්නම් තර්කෙට. ඛෙත්තාරාම පිට්ටනියේ ලංකාවයි පකිස්තානෙයි අතර ක්‍රිකට් ගැහිල්ලක් තියනකොට පකිස්තාන් කොඩිත් සෑහෙන ප්‍රමාණයක් වැනෙනවා. අපේ කොළඹ මුස්ලිම් කොල්ලො ලංකාව පැත්තකට දාල පකිසන්ට සපෝට් කරනවා. ඕව දකින අපේ ලේ කෝප වෙන්න ගන්නවා. පත්තර වල පවා මේ ගැන විචාර සමහර වෙලාවට පළවෙනවා මම දැකල තියනවා. තමන්ගෙ නිජබිම පාකිස්තානේ නොවුනත් අදහන ආගම සහ රට මුස්ලිම් රටක් උන නිසාවට අපේ මුස්ලිම් උන් පකිස්තානෙට චියර් කරනවා. ඒවා දැක්කම අපේ උන්ගෙ "ඇඟේ මාළු ගඟේ නටන්න" පටන්ගන්නවා.

ඔය තත්වෙම අපේ ලංකාවේ කොල්ලො කෙල්ලො ඕස්ට්‍රේලියාවේදි උන්ට කරනකොට "ඔසියන්ට" කොහොම කික් එකක් ඇත්ද? අනිත් එක උන්ගේම රටේ උන්ගේම පිට්ටනි වල අපේ එවුං උන්ට වැඩිය වැඩි පිරිසක් ලංකාව වෙනුවෙන් චියර් කරද්දී මට නිකමට හිතෙනවා සංක්‍රමණ නීති රීතිත් තද කරයිදෝ කියල. ඇයි යකොඩෝ "ගඟෙන් වතුර බීල, මුහුදට ආවඩනවා" වගේ වැඩක් නෙ මේක. ඔය ප්‍රශ්නෙදි සමහරුන්ට තර්ක කරන්න පුළුවං එහෙදි ඔය වැඩේ කරන්නෙ ලංකාවට සංක්‍රමණය වෙච්ච පළමු පරම්පරාව විතරයි කියල. එහෙම බැලුවම එකෙත් අත්තක් තියනවා. දෙවෙනි තුන්වෙනි පරම්පරා වලදී ඔය තත්වේ වෙනස් වෙන්න ඉඩ තියනවා. 

  "ඕස්ට්‍රේලියන් Idol" තරඟ වලට ඉදිරිපත් වෙච්ච සමහර ලාංකික සම්භාව සහිත පරම්පරා සාමාජිකයො ලංකාව ගැන ඒවා වලදී කතාකරන්නෙ වත් නෑ. ඒ කියන්නෙ තව කාලයක් යද්දි ලංකාවේ කොල්ලො එහෙ ක්‍රිකට් ගහනකොට අපිට චියර් කරන්න "ඔසී ලාංකිකයෝ" එන එකක් නැද්ද ? අනේ මන්දා? කොහොම උනත් අපේ එවුං එහෙ ක්‍රිකට් ගහද්දි අපේම කොල්ලො කෙල්ලො උන්ට චියර් කරනවා දැක්කම මාර ගතියක් ඇඟට එනවා. ඒත් ලංකාවේ මුස්ලිම් කොල්ලො පකිසන්ට චියර් කරද්දී අපට මල පනිනවා. වැරැද්ද කොතනද?

 අපේ හාමුදුරුවරු එහෙ ගිහිං පන්සල් හදාගන්නකොට, සුද්දන්ට ධර්ම දේශනා කරලා උන්ව බුද්ධාගමට හරවගන්නකොට ඒක මරු. උන්ගේ ක්‍රිස්තියානි කාරයෝ ලංකාවේ මිනිස්සු උන්ගෙ ආගමට නැඹුරු කරගන්න හැදුවොත් අන්න අපිට මරු නගිනවා . අල්ලගෙන ගහනවත් එක්ක. අපේ මිනිස්සු ඒ රටවල ගිහිං දියුණු වෙලා දේපල වත්කම් අත්පත් කරගත්තොත් ලොකු හෝටලයක් හැදුවොත් "අන්න ජාතික වීරයා". සුද්දෙක් ඇවිත් මෙහෙ ඉඩම් කෑල්ලක් ගත්තොත් "මෙන්නෝ මවුබිම විකුණනවෝ" . වැරැද්ද කොතැනද ? 

ලංකාවේ කොල්ලො කෙල්ලො සිඩ්නි වල මෙල්බන් වල මැච් බලන්න ගිහිං අරගත්තු සෙල්ෆි වලින් බුකිය වැහි වැහැලා. මේ කාලේ ඉතිං "ෂෝ" කාලෙනේ. තව පරම්පරා කීපයක් යනකොට ඔය කතන්දරේ වෙනස් වෙලා යයි. සමහර විට ලංකාවට ටුවර් එකක් ආපු "ලාංකික ඔසියෝ" ඛේත්තාරාමේ ලංකා ඕස්ට්‍රේලියා මැච් එකක් බලන්න ගිහිං ඔසියන්ට චියර් කරයිද කව්ද දන්නෙ. ලෝකෙ වෙනස් වෙනවා. කලවම් වෙනවා, එන්න එන්නම පොඩි තැනක් වෙනවා. හැබැයි එක දෙයක් නම් තියනවා. පාකිස්තානේ ලංකාවේ ගහද්දි හැමදාටම පකිසන්ට කෑගහන්න එන ලංකාවේ සෙට් එක නං හැමදාම කෑගහයි වගේ මේ යන විදියට...